school news

اليوم في المدرسة صارت لنا سالفة، في الطابور صفنا خايب مايحبون يسون شي بس الي جدام واقفين يسون الي تقوله المعلمة الي هو التمارين الصباحية، المهم الصف الي يمنا مربية صفهم تأخرت فصفهم صار كلا ازعاج ويسولفون ويضحكون، جان معلمة تعصب وعبالها من صفنا مع انا احنا ماسوينا شي وهادئين، وبعدين يوم بنروح الصف المعلمة قالت ثاث اعدادي بيتعاقبون وبيتمون واقفين والمديرة بعد كانت معصبة علينا تناقشت مع مشرفات القسم وقالت لهم بيتمون واقفين 3 الحصص الاولى و يت يم صفنا وزفت بنت من الي ويانا في الصف قالت لها ان انتي قليلة أدب ومصدر الإزعاج و انتي رئيسة العصابة و و و، ولا بعد ماكتفت وقالت لها انا اجوفج ع طول تتحركين و تروحين واتين ع كيفج كأنج قرد يتنقز وانت اللعام راسبة وبعد تبين ترسبين السنة بس البنت صاحت تأثرت ( مسكينة ) ولا بعد ما كتفوا نوقف 3 حصص قالوا لنا ان كل وحدة بنتقص 5 درجات من درجات السلوك في كل مادة يعني 35 درجة ولا ويقولون لنا ان نسبة النجاح في الفصل الأول 58% (طبعاً نسبه نجاح ع مستوى مدارس البحرين الاعدادية مو تفوق بعد نجاح بس)


وقفت المديرة شوي وبعدين راحت مكتبها و قالوا لنا الحصة الاولى بيعتبر الدرس مشروح و ما بينشرح وخلوا كل صف يوقف في جهة، ويات المدريرة المساعدة وقالت كل بنت تطلع من صفها وتروح تعتذر، وراحوا اعتذروا وقالوا لنا نكتب رسالة تعهد و توقع كل بنت و الصفوف راحوا بقينا بس احنا في الساحة حصتين تقريبا وبعدين طلع ان بس احنا الصف الوحيد الي كتب رسالة و وقعوا :(

7amood photos

هاي صور ولد خالتي اليديد مثل ما وعدتكم اني بحطلكم صوره ، صورت له بس جم صورة لانه كان نايم :/

مخنفر شوي يعني مو تقولوا اني اعيب لا ترا حتى خالتي الي اهيا امه تعلق عليه بعد

ككاو (يعني اسمراني)

و سلامتكم :)

سوالف خدم

خالتي صارت لها مدة يايبتلها خدامة ، بالبداية كان الوضع كلش طبيعي و عادي الا فيها حركات شوي يعني تلاقيها قاعدة بالمطبخ بروحها و ماسكه التلفون و تهذر مع ماادري منو و صوت الضحكة للشارع و ما تسكت يعني مجابلة التلفون نص الوقت خالتي ما كانت تتحجى لها من البداية ( لان كانت تعبانة و حامل و مالها خلقها ) بعدين لمه ولدت خالتي ، خالتي الثانية أخذت الياهل و الشغالة عندها بالبيت و يابوا لنا ولدها ( علوي) عندنا بالبيت جم يوم تقول بالليل كلش تقول أنها راح تنيم الياهل و اهيا اصلا مو ماخذته تنيمه لان علوي ما يرضى ينام عندها و اهيا قاعدة بذيك الغرفة و عندها التلفون و تقول خالتي اهما تحت و صوت ضحكتها موصل عندها معنا الباب مصكوك ، بعد ما ولدت خالتي ما شفناها الا تتحلطم و جي و تقول انا ماابي يهال انا يصير مينون ( شفيج يمعوده الياهل واحد و اصغير عمره بس سنه و 10 شهور ) و تقول ماتبي اليهال قالتلها خالتي انا مابيج تسوين شي لي و لعيالي انتي عليج بس البيت مو طالبه منج شي ثاني ، هذا و لا شي بعد من الي سوته ، خالتي يايبتها بس شهر يعني ع حساب المكتب و بعد مده خالتي كانت تعبانة كلش عبالها خلاص كملت الشهر حاطه ابالها انها يوم الاثنين خلاص تكمل الشهر ، عاد الخدامه قالت مدام انا بيروح بيت اختي قالت لها خالتي اووكي انتي كملتي شغلج خلاص روحي ، كانت مدوتنها المكتب مرة وحده على انها خلاص كملت الشغل ، ارفيجة خالتي زايرتنها و خالتي سألتها جم التاريخ قالت لها تاريخ اليوم 23 قالت اوه عيل يعني ما خلصت الشغل و انا دازتها للمكتب و بعد رايحة بيت اختها بعدين خالتي اتصلت لها و قالت الها ترد البيت اختها بعد اهيا الي ردت ع التلفون و قالت لخالتي مدام خلاص اهيا حصلت شغل غير عند واحد احسن و يعطيها فلوس اكثر قالت لها خالتي اصلا انا يايبتها ع حساب المكتب مو ع حسابي و عشان تبي فلوس اكثر ، قالت لها انزين ردي البيت ما ردت و لا يفوتكم الراقية مو بس جذي ما تدق ع خالتي مباشرة تسوي لها مس كولات !! قالت لها خالتي ما عليه انا اوريج و بعدين لمه راحوا المكتب و ليه تقول خالتي ظالمتها و جذي تخيلوا !! أكثر من الي سوته لها و انا بعد كنت عند خالتي جم يوم و شفتها بعد يعني خالتي تكرمها بشكل مو طبيعي و كل شي تبي تعطيها و حتى لمه طاحت المكينه ع ريلها خالتي علمتها شلون تدلك ريلها و قالت الها تحط عليها ثلج و كانت خايفه عليها عدل و راحت الصيدلية اشترت لها فكس و كريم عشان ريلها بس عشان لا يصير فيها رض و عطتها بندج بعد و بالاخير يعني جذي ترد المعروف لخالتي و غير جذي بعد خالتي ما تاكل وايد و ولدها اصغير يعني اكلهم يصير بقدر اصغير بس هاي لمه يت تاكل دبل عليهم اثنينهم و غير العصير الي خالتي تشتريه بعد لولدها و لها رايحه يايه فيه خلصته ما كانت تقول لها خالتي شي و بعد لمه يت كان عندها بس بدلتين خالتي عطتها ثياب و شنطة متروسة ثياب و حتى بنطلونها كان الجرار الي فيه خراب ركبت لها جرار يديد و بعد كل شي عطتها يعني ادوات صحية و حتى عباية يديدة عطتها و شيلات بعد ماكان عندها و لا شي تطلع و اهيا عندها كل شي و بالاخير تسوي جذي يعني جزاء الاحسان هذا و كل شي كانت خالتي تسوي لروحها تسوي لها بعد ما تخليها في كل شي يعني احنا اذا نروح بيتهم ما تقصر معانا شلون هاي بعد ، بعدين طلع صاحب المكتب يعرف عايلتنا و يعرف خالتي يعني مشى لها المعاملات و خالتي بعد قالت له عنها و عن كل الي تسويه و ع سالفة التلفون بعد شفنا عندها صور اباحية بعد و مصورة روحها و اهيا عارية !! بس يعني اكيد خالتي ما قالت لهم عن الصورة و لا شي بالاخير خصموا من معاشها عشان الشغالة اليديدة تكمل المدة لان خالتي ما بغتها بعد وحتى تراجيها (earrings ) بعد ما لقتهم بالبيت بس خالتي سكتت عنها و لا اتكلمت، و علوي الحين بعد انعدى منها قام يتحجى مثلها لانها مشتغله سنتين بلبنان و سنتين في دبي عند عايلة سورية و بالبحرين بعد 10 تشهر الحين قام يتحجى مثلها يقول شو بدك و دايماً يقعد يناديها بالبيت يعني معقولة كل هالسنين مااشتغلت ابيت عندهم يهال!! و بنت خالتي بعد خدامتهم مأذتنهم يقعدون من الصبح ما يلاقونها و كلا تدور بالفريج و تطلع و اذا يت البيت التلفون بيدها و ما تسكت بعد و بالاخير يطلع عندها بوي فريند يحليلها.

سوري طولت بالحجي ^_^

New baby born

يوم الخميس ولدت خالتي و يابت لنا بيبي يديد سموه محمد و رحنالها المستشفى يوم اليمعه بس خسارة ما صورت البيبي ، بس صارت لنا مواقف اهناك تضحك اول ما دخلنا اهناك شفنا مره تقول ماشالله ماادري ليش من يشوفوني انا و اختي عبالهم توين او سمثق لايك ذس و الله يسلمكم كان معانا يهالوا يعني تقول اختي لان جيش الظاهر وصل و المكان اهناك وايد ضيج بالغرفه الي مقعدين فيها خالتي و اهناك ناس وايد حتى يعني صار غصه المكان حتى اختي بتطلع و ليه تفتح الستارة تشوف جدامها وحده غير والده يعني ماكو مخرج وايد ضيج المكان بس كانت خالتي مسكينه وايد تعبانه و تقطعت لها المشيمه وسوولها عمليه تنظيف و الياهل بعد فيه ابو صفار ( ما تشوفين شر يا خاله و يتربى بعزكم حمودي )

pictures from paris

Eiffel Tower & Quai d'Orsay

Gardens of Notre Dame

Fontaine des Quatre Parties du Monde

paris

---------------------------------------------------
Cafes

Back 2 school

الاجازة تقول : بـــاي
المدرسة تقول: هـــاي
والتعب يقول: يـــاي

شكر ..

أود ان اشكر كل من ساعدوا و دعوا لاختي في امتحان العرب ، تقدم لكم خالص شكرها و امتنانها لكم و بالاخص خالو ام مود ( مشكورة خالة و للحين ما ننساج من دعواتنا ) وتشكر المباركية و بحرينية قدساوية و كلكم من الي ساعدتوها مشكورين من قلب ..
الحين اطلعت النتيجة و كانت طيبة و نقصت بس درجة وحدة من الامتحان فيابت 49 من 50 و كله الفضل يعود لله تعالى و دعواتكم و لله الحمد ..
في الاخير تقدم للكل هاي النصيحة :
مهما مرت الايام و اشتدت المصاعب و ازداد غموض الدنيا نستطيع أن نهزم الظلام بخيط من النور و أن نشعل شمعة امل تقودنا و ترشدنا الى الطريق السليم و ان نتجاوز المحن و الشدائد و ننتقل الى عالم النور في هذا الكهف المظلم ( فكما تقول الحكمة العلم نور و الجهل ظلام ) لننتقل الى المستقبل المجهول بشعاع من النور و الامل لتصبح امامنا الطريق واضحة و سهلة و يصبح مستقبلنا مشرقاً تتفجر خيراته ينابيعاً و انهاراً ، تسقي الورود على الجانبين.
فالنفس دائماً تشمئز من عبوس الكتب و يثقل القلم في اليد و لكن عندما نتذكر ما الذي ترنو اليه انفسنا و نطمح اليه تبتسم الافكار على صفحات الكتب و تنجلي الغيوم عن صفحة النفس ، لتخطوا في دربها، فحاولوا أن لا تنظروا الى الوراء بل للامام دائماً