الأربعاء، 18 مارس 2009

school news

اليوم في المدرسة صارت لنا سالفة، في الطابور صفنا خايب مايحبون يسون شي بس الي جدام واقفين يسون الي تقوله المعلمة الي هو التمارين الصباحية، المهم الصف الي يمنا مربية صفهم تأخرت فصفهم صار كلا ازعاج ويسولفون ويضحكون، جان معلمة تعصب وعبالها من صفنا مع انا احنا ماسوينا شي وهادئين، وبعدين يوم بنروح الصف المعلمة قالت ثاث اعدادي بيتعاقبون وبيتمون واقفين والمديرة بعد كانت معصبة علينا تناقشت مع مشرفات القسم وقالت لهم بيتمون واقفين 3 الحصص الاولى و يت يم صفنا وزفت بنت من الي ويانا في الصف قالت لها ان انتي قليلة أدب ومصدر الإزعاج و انتي رئيسة العصابة و و و، ولا بعد ماكتفت وقالت لها انا اجوفج ع طول تتحركين و تروحين واتين ع كيفج كأنج قرد يتنقز وانت اللعام راسبة وبعد تبين ترسبين السنة بس البنت صاحت تأثرت ( مسكينة ) ولا بعد ما كتفوا نوقف 3 حصص قالوا لنا ان كل وحدة بنتقص 5 درجات من درجات السلوك في كل مادة يعني 35 درجة ولا ويقولون لنا ان نسبة النجاح في الفصل الأول 58% (طبعاً نسبه نجاح ع مستوى مدارس البحرين الاعدادية مو تفوق بعد نجاح بس)


وقفت المديرة شوي وبعدين راحت مكتبها و قالوا لنا الحصة الاولى بيعتبر الدرس مشروح و ما بينشرح وخلوا كل صف يوقف في جهة، ويات المدريرة المساعدة وقالت كل بنت تطلع من صفها وتروح تعتذر، وراحوا اعتذروا وقالوا لنا نكتب رسالة تعهد و توقع كل بنت و الصفوف راحوا بقينا بس احنا في الساحة حصتين تقريبا وبعدين طلع ان بس احنا الصف الوحيد الي كتب رسالة و وقعوا :(

20 التعليقات:

joe يقول...

المدارس في هذه الفتره اصبحت ليس مكان لتهذيب الابناء وتربيتهم بل اصبحت مجرد تأدية الازم على المعلم و اجراء الاختبار لاختيار الوظيفه المناسبه بالمستقبل
من وجهة نظري
ان من واجب المعلمين من ضمن الخطة التعليميه ضرب الطلاب و تعذيبهم بشتى الطرق

بنات عبدالغني شربت يقول...

امبييه كل ه>ا عشان تمارين الصباح

لو انا منكم ما اسكت لهم اليوم الثاني ولي امري عندهم
شنو فوضى اهي

الله يعينكم صراحه


*

حلا شربت

!. دفء البوح .! يقول...

... عزيزتي ... باريس

هناك الكثير من المواقف التي تزعجنا خلال فترة الدراسة وتضجرنا ولكن صدقيني يوماما لن تكون سوى ذكرى جميلة نضحك عند تذكرها...

حصل معي موقف مماثل ايام الثانوية تكسير للعظام لمدةثلاثة حصص من الوقوف و الآن اتمنى \أن تعود أيام الدراسة والشقاوة.

وفقك الله وادام ابلتسامتك
:)

TruTh يقول...

والله يا باريس ما تستاهلين اللي صارلج

حرام والله اذا انتي و صفّج مو مسوين ازعاج و يعاقبونكم على ذنب ما سويتوه

ليش ما قلتولهم ان مو انتوا اللي كنتوا مسببين اللوية ؟

قانونى كويتي يقول...

المدارس تحتاج الى فن بالادارة

يعنى على سبيل المثال صارت الفوضى اللى قلتى عنها

طيب وين المدرسة اللى على الصف المفروض انها تتحاسب بالاول

لان المفروض انها تكون واقفة جدام الطالبات

واى خلل يصير المفروض يكون لها دور وتتدخل من البداية وتمنع حدوث الفوضى

بس للاسف الشديد ترى اغلب الابلات الحين سواء بالبحرين ولا بالكويت للاسف الشديد لاهين بامور ثانية

يعنى خل يعذرونى الاخوات اللى مشغولة بهموم الزواج ومشاكل البيت واللى تفكر بزوج المستقبل واللى تفكر بطيلقها

يعنى بالذمة وين لهم خلق الله يعينهم على حالهم

وتحياتى لج يا باريس على موضوعج الشيق

بس اتمنى انج ما اتشيطنين مرة ثانية

وخلج احسن البنات

Paris يقول...

المباركية

احترم وجهة نظرك..

بس بالنسبة لي الطق و التعذيب حرااااام صراحه موزين و بعديين ماييب حل سوا المشاكل و تعقيد الطلبه و حتى لو بيكون فيه التزام محد بيلتزم موزين نزرع الذعر ع وجوه الطلبه و احس انها سياسيه استبداديه و بعدين الوزاره مانعه الضرب في المدارس و حتى علامه الغلط الي يحطونه لليهال في نظام فصل الابتدائي منعوه عشان يا زعم لا يحبط من معنويات اليهال

و مشكور :)

Paris يقول...

حلا شربت

محد اصلا سكت عنهم و لا بيسكتون عندهم اصلا كل يوم و الثاني ولي امر بالمدرسه بس شنسوي

مشكورة ع الزيارة الطيبه منج :)

Paris يقول...

دفء البوح

كلامج صح ، كل شي يظل ذكرى و خصوصاً ذكريات المدرسة تظل محفورة بالاعماق

تسلمين حبيبتي ^_^

Paris يقول...

TruTh

شسوي بعد انا خو مسالمه مااقدر اتحجى لهم

قلنالهم بس ماكو فايده منو الي يسمعلنا :(
حتى البنات قاموا يبجون مساكين

Paris يقول...

قانونى كويتي

المدرسه وجودها ما عدم وجودها واحد بس فيه معلمات ينظمون صج، و هو المفروض انها تمنع الفوضى و يحاسبونها اهيا بعد لان واقفه بس جذي
و كل شي يصير يحطونه ع الطالبات و المعلمات مالهم ذنب

انا ما تشيطنت عمو و الله و انا مأدبه بعد روح اسأل عني و شوف شنو يقولون لك ترا ما يقولون عني شي موزين بس يقارنون بيني و بين اوخيتي لان هذيك درجاتها احسن و لانها ما تنقص بس نص درجه تصيح فخالينا التوب عندهم بالمدح

Kuwait يقول...

@@
3 حصص واقفييييييييييييين ! :\
ويـح قلبـــي
لو انا معاقبيني هالعقاب جان عادي أطق المديره ;q

Paris يقول...

هلا و الله بكويت الغاليه

لووول ضحكتيني و الله لو اطقها جان سيده فصل
بس بالاخير وقفونا حصة و نص مو ثلاث

بنت أحمد يقول...

اووووووو شنو هذا

حرام 3 حصص توقفون

ليه كذا !!!!!!!!

الله يعينكم ويعين المدرسة عالفصل

سوالف المدارس ابد ماتنتهي ليه ماادري

كله مشكل مشكل <<< قلبت هندي

ربي يعينك ويوفقك ان شاءالله

Paris يقول...

بنت أحمد

تسلمين حبيبتي ع المرور

بالتوفيق للجميع انشالله :)

غير معرف يقول...

ليش جي يسون وفيكم؟؟

جن احد قال انع مو انتوا

لو انا جن بجيت لوول والله سالفه تقهر

بـابـل يقول...

والله حرام عليهم هذا مو عقاب

هذا تعذيب نفسي 3 حصص عاد هههههه


الله يعينكم بس هم لازم تحترمون الطابور والمدرسات


وبس


بابل

|:| DUBAI |:| يقول...

شوقتينا حق أيام المدرسة

: )

Paris يقول...

Free_Moi

لا تحاتين جان ع البجي البنات بجواا لوول

اكيد بنبجي موو منا يسوون فينا جي و

انا دمعتي حابستها كنت لوول

تسلمين حبيبتي ع زيارتج ^_^

Paris يقول...

بابل

هذا مو بس تعذيب نفسي الا تعذيب جسدي

بعد من الوقفه تكسرنا و ع الاحترام شي

طبيعي نحترمهم بس مو الكل طبعاً

Paris يقول...

|:| DUBAI |:|

حياج حبيبتي

ترى سوالف المدرسة ما تخلص لوول