الجمعة، 18 ديسمبر 2009

National Day of bahrain

أدري متأخرة العيد الوطني طاف من يومين

16th / Dec

Happy National Day Bahrain


الخميس، 26 نوفمبر 2009

Back again


السلام عليكم
رديت من بعد غياب طويل و آسفة على القطاعة الطويلة ، بصراحة ما كان عندي وقت اسوي شي و اتابع المدونات ، بس بعد ما نسيتكم كنت اشوف شتنزلون و شتكتبون و ظروف صارت عندي من فتحت المدارس لي الحين كل مابي اكتب شي مايصير عندي وقت كلش و تونا مكملين امتحانات المنتصف و علاوةً ع ذلك ع قولتهم بالعربي كرهت المدرسة من اول يوم خلوني اصيح من البداية :(
بس حبيت اني أهنئكم بالعيد "عيدكم مبارك و كل عام و انتوا و ايامكم سعيدة :) "
و بحاول اني قد ما اقدر ما اقطع عنكم فتره اطويلة
فيه شي ثاني ابي اقوله لكم صح اني ماعرف اعبر و لا اعرف اتكلم جد يعني بس مادري الحين شفيكم يعني كل بلوقر الحين صك مدونته و اعتزل التدوين ليش؟؟! ها ليش؟ يعني مادري شقول و الله هالشي يضايق ، الانسان اذا اتعود على شخص او على اي انسان اثر في حياته لو بشي بسيط لازم يفتقده ، ادري انه الكل مشغول و صج حسيت بهالشي في هالوقت ، بس لكل شخص معزة عند غيره حتى لو اهوا نفسه ماحس بهالشي ، انا ماقدر افارق أي انسان اثر بحياتي حتى لو شويه ، الانسان لو بيقعد يتذكر لحظاته معاهم بيتذكر كلامهم بيحس انه قاعد يفتقد شي ، انه فيه شي بحياته ناقص.. شي انسلب منه ، الانسان مايدري شكثر كلمته تأثر على غيره مايقدرها مايحس بقيمة الشي الا اذا فقده ، يعني كل شخص عزيز طيب قمنا نفقده بهالوقت ... لا تروحون بليييز لا تبعدون احس انه البلوقرز صاروا جزء من حياتي شي مني ماقدر استغني عنه حبيتكم كبيركم بصغيركم احس انه هالشي ماقدر افقده اذا تحسون انه انتوا ماتقدرون تستمرون بالتدوين بليز لا تقاطعون خلوا شويه فيه لكم اثر نطمن عليكم صج انه بعيدة المسافات بينا بس لا تخلون القلوب بعيدة انا و الله اخاف .. اخاف اذا احد يبعد اذا احد ماله حس مانقدر نتواصل مع بعض. كل يوم نفقد شخص عزيز و غالي أولهم كويت بعدين دبي ( الحمدلله رديتي) و الحين بابل ليش ؟! ماتدرون شكثر نفتقدكم بغيابكم ، صج انه المسافات بعيدة بس خلونا نقرب هالمسافات بينا لا نبعد اكثر و الله افتقدكم افتقدت كويت حيل شكثر كانت خفيفه دم و حبوبه رجاءاً يعني الي يعرفها يسلم عليها و يقولها شكثر انا مشتاقة لها ، ادري اني اقدر ادز لهم رسالة ع الهوتميل بس ما احب ابطل الهوتميل وايد يتيمعون ايميلات شكثر و ماشتهي ابطلهم بس رجاءاً طمنونا عليكم لاتبعدون و الي يرحم والديكم ترى فيه ناس تفتقدكم بغيابكم ..

السبت، 19 سبتمبر 2009

عيدكم مبارك

عـيدكم مـبارك
وعساكم من عواده

السبت، 12 سبتمبر 2009

ليلة القدر


بِسْمِ اللَّهِ الرَّحْمَنِ الرَّحِيمِ

إِنَّا أَنْزَلْنَاهُ فِي لَيْلَةِ الْقَدْرِ (١) وَمَا أَدْرَاكَ مَا لَيْلَةُ الْقَدْرِ (٢) لَيْلَةُ الْقَدْرِ خَيْرٌ مِنْ أَلْفِ شَهْرٍ (٣) تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِمْ مِنْ كُلِّ أَمْرٍ (٤) سَلَامٌ هِيَ حَتَّى مَطْلَعِ الْفَجْرِ (٥)

ومن فضل هذه الليلة ما روي عن النبي (ص) قال: قال موسى: إلهي أريد قربك ، قال: قربي لمن استيقظ ليلة القـدر ، قال: إلهي أريد رحمتك ، قال: رحمتي لمن رحم المساكين ليلة القـدر ، قال: إلهي أريد الجواز على الصراط ، قال: ذلك لمن تصدق بصدقة في ليلة القـدر ، قال: إلهي أريد من أشجار الجنة ، قال: ذلك لمن سبَّح تسبيحة ليلة القـدر ، قال: إلهي أريد رضاك ، قال: رضاي لمن صلّى ركعتين في ليلة القـدر .

الجمعة، 4 سبتمبر 2009

عودة من بعد غياب طويل


هاي بلوقرز .. اشلونكم .. سوري عـ القطاعة الطويلة و متباركين بالشهر و عساكم من عواده و متباركين بهالليلة بمناسبة القرقاعون و كل عام و انتوا بخير :)

السبت، 4 يوليو 2009

4th / July

السبت، 27 يونيو 2009

العطله معاي : (


السلام عليكم و رحمة الله و بركاته


بدايةً حبيت ارحب بكم بكيكه النجاح هذي ع طلب علي الملا ( ما يصير خاطرك الا طيب يا علي و ادري تأخرت < صح النوم ) طبعاً اهيا من زمان و من متى مخلصين مدرسة جريب بنكمل شهر بس سامحوني اذا قصرت مع احد و لا شي تراني متملله حدي بهالاجازة و مافيه شي اسويه و متخايبه ، ابي اشغل وقتي بشي ابي اسوي شي ماكو شغل الجو حار برع و ما حتى ماتدرين تطلعين طلعت بس شويه بالحوش احس روحي صرت باربكيوو حر حر حر بشكل مو طبيعي اذا حر الدنيا جذي شلون حر الآخره .. اعوذ بالله من عذاب النار و غضب الجبار و الله يجعلنا وياكم من الصالحين المهتدين و الفايزين برضوانه و جناته و يبعد عنا عذاب النيران ، لانه صج صج اذا الواحد يشوف جذي حر الدنيا يفكر بحر الاخره شلون اذا هاي و لا شي من حر الاخره .. ما اقول بس الا الله يعينا بصراحه حر جهنم فطسه ما تطلعين برع دقيقه و تيين الا ويهج احمر و دايخه و حتى البشره قامت تبقع و يطلع حرار مادري شيسمونه من هالحر ، معني ما اطلع بعد لان ما اقدر ع الحرارة . افكر يعني الناس شيسوون بالاجازة غير السفرات مللللللل و لي اليوم و لي باجر لو اقول ملل ما اخلص ، الجو فطسه حر يعني ما ينطلع مكان و اذا بيروح مكان لازم مكان مكيف مولات و غيره مليت من هالاماكن ،ابي مكان اروح له .. الواحد بالصيف حتى شهيته تنقطع و ما يبي ياكل الا اشياء بارده و سوائل حتى الاكل صايره ماحب اكل الفواكه تخترب و اهي بالثلاجه محد يعطيها ويه و انا من اكل شي و طعمه ما يعجبني اطنقر ع الكل و ما اكل شي حدي اذا باكل اكل ككاوات و حتى الحين اشاعات طالعه بعد السنكرس و تويكس وباجي الربع و من ضمنهم كادبوري فيه من مشتقات الخنزير يعني شناكل ما باجي الا يقولون بعد Lindt و Ritter sport و Hershey's و غيره مسممين و فيهم من مشتقات الخنزير .. مادري يوم اليمعه شاللي خلاني اكل برتقال احمر (مادري شيسمونه ) يمكن لان كنت مع عايلتنا و الكل ياكل فشتهيت اني اكل بس عجبني لاهو حلو و لا حامض مادري شلون طعمه و من الملل ذاك اليوم ماكو شي اسويه و لا كتاب عدل اقرا فيه قعدت اقرا كتاب English grammar تعلمت لي جم شي ع الاقل ، و حتى كليلة و دمنه صار لها دهر عندي ما اقرا فيه شي مليت احس روحي حفضت اسلوب ابن المقفع من تشوفون شي بابدايته مكتوب زعموا ان عرفوه انه ابن المقفع صار لي سنوات و انا اقرا فيه بصراحه الكلمات ما ينفهم لهم عدل و الكلمات السهلة مخليين لها هوامش تحت معناها مثل مقايضه هاي عاد كلمه سهله و فيه كلمات حتى ما تنقرا مب مكتوب لها أي معنى فأتملل اقرا فيه و القصه الوحده جم حكمه فيها يعني الواحد يبيله يقراه بتمعن عشان يفهم مضمونه، و مسجله في دورة فوتوشوب و خبر خير ليلحين ما بدت و لا ادري عنها بعد . و من قد ماهو ملل اقعد اقرا بالبلوقات ..النت اهو الونيس الوحيد بعد الفترة الاخيره الكل انشغل بامتحانات و غيره .. واحشتني كويت احد يعرف عنها شي ماشي ليش اختفت مره وحده ؟؟
ابي اقتراحات شي اسويه بهالعطله مليت و يزاكم الله خير ----------------------------------------------------------------------

يوم السبت السبوع الي طاف طلعت مع خالتي انا و اختي و بنت خالتي و خالة افتخار ( وحده من الاهل ) و معانا علوي ولد خالتي الي اهوا اخو حمود انا احبه هالياهل لطيييف بصراحه و ينحب بسرعه و عليه حركات تخلي الواحد يضحك و ما يمل منه.. المهم احنا رايحين نشتري لعمته هديه أول ما ركبنا السياره كان اهوا داخل من تدش وحده قال سكي باب قلنا اكيد صاير شي معقوله يعني بيقول هالحجي مني و الطريج قالت لنا خالتي لاني معلمته من يدش يصك الباب و بعد يتأكد كلنا ركبنا و له لا.. ينادي بالاسامي وين ستومه قلنا له كاهيا قال قعدي ستومه بعدين و احنا رايحين و له بنت خالتي تزعله و يسوي روحه يبجي و زعلان الا يقول ييبي كلينكس قلناله ما عندنا و الا خاله افتخار تقول طلعت منت هين يالسعودي خايب النُوا ما تعطي ويه و لحاجتك تبي ضروري و فاضحنا فضاح ما ظل احد ما يعرف اسمنا بسبتك مو مسوي سوايا، قالت لنا ها عطوه و يسوي روحه يمسح دموعه و لو تشوفون ويهه و لا دمعه نازله بس يسوي روحه رجيج ( رقيق ) فوق اللازم عاد اهوا زعل اهني و من تحط شي بالسله قال بقتّه زباله و ظل زعلان منها و يقولها السعاده السعاده ( يعني عساج السعاده ) و بعدين عطته عصير قالت له ها اخذ اشرب قال لها ييبي قطا قالت له وليه ما تخلص شروطك <عشان اذا شرب يصك الغرشه بروحه محد يصكه له .. و بالاخير ردتنا البيت لازم يتأكد ماما سكيتي باب قالت له اي قفليه قفليه ماما قفليه و يتأكد كلنا يينا ، مسكين عاد خاله افتخار مسويه له فلم رعب و ما تناديه الا علوو والسعودي .

سكي = صكيه ، قطا = غطا ، بقته = بقطه ، ستومه= فطومه


هالصور لمن نايم معاي ذيك المره ابي اصوره ما يووقف عدل بس يستانس ع التصوير من يشوف الكاميرا عندي قال السورة بالتلفون ( يسميها تلفون ) فرق بينه و بين اخوه ما يتشابهون

ما يعطي ويه اهني


الخميس، 18 يونيو 2009

عزيمة أمس


صراحة سالفة أمس لووووووووووووووووول .. ما أدري شلون ابتدي ابها المهم يعني نبدي السالفه لوول
ارفيجتي ابتسام قالت لي بتيي بيتنا ع عشا يوم الاربعاء تاريخ 17 .. قلت لها بتيين بروحج وله اقول الى بنات صفنا اييون ( طبعاً مو الكل ) اول وحدة قلت لها يعني قبل جم سبوع قالت لي ما بقدر ايي بنات خالي عازميني ع عيد ميلاد.. و أول أمس قلت لهم قالو اوكي بنيي وجم وحدة قالت مو أكيد .. الاكل جاهز وكلشي ، شبكت ع ايميلي أسألهم اذا أكيد بييون الا وحدة تقول انا ما بقدر ايي لان ابوي عازمينه ع ما ادري شنو واذا اهي ما يات يعني رفيجتها ما بتيي .. واتصلت الى وحدة من البنات قالت لي ما أقدر ايي و اذا ما يات اهي يعني حتى وحده معانا بالصف الي يم بيتهم ما بتيي .. سألت الخامسة اقول لها بتيين قالت لا كا حطوا العشا .. اتصلت الى رفيجتي بسوووووووومه .

أنا: هاي بسومة
ابتسام: هلا .. ياو البنات ؟
أنا: لا ولا وحده ، تدرين انه و لا وحده بتيي !!
ابتسام: ولا وحدة!!؟؟
أنا: ايي ولا وحدة، كل وحدة قالت لي شي ، الي ابوها عازمينه والي ما ادري شنو ..
ابتسام: انا بعد يمكن ما ايي بتصل لخالي بشووف (لان ابوها مسافرو امها في بيت ابوها العود)
أنا: تعالي احسن لج لان انتي الي مخططه لهالعزيمه.
ابتسام: اوكي باي ، بتصل الى خالي بشوف شنو يقول.
أنا: اوكي ، باي.

~~~~~~~~~~~~~~~~~~~~~~~~~~~~~~~~~~~

بعدين ردت دقت علي مرة ثانيه

ابتسام: قلت الى خالي ، قال ما يقدر اييبني
أنا: شووفي احد يقدر اييبج
ابتسام: بتصل لعمي بشووف
أنا: اوكي

~~~~~~~~~~~~~~~~~~~~~~~~~~~~~~~~~~

ابتسااام مره ثالثه :@

أنا: شنو قال لج
ابتسام: قال ما بييبني، او اذا بييبني ما كو احد يردني .
أنا: انزين قولي الى اختج.
ابتسام: توي متهاوشه معاها و حامل بعد ما تقدر يعني ماكو احد يقدر اييبني.
أنا: اوكي انا بيي لج و باخذج.
ابتسام: أول بسأل امي.

~~~~~~~~~~~~~~~~~~~~~~~~~~~~~~~~~~~

ابتسام: مارضت امي
انا: اوكي ماعليه ، لكن ما بيي عرسكم مادري شنو عندكم
ابتسام: لا تعالي تعالي
أنا: ما بيي :@ باااي : (
ابتسام : بااي
~~~~~~~~~~~~~~~~~~~~~~~~~~~~~~~~~

لكن صج فشيله موقف محرج :$ و كله بسبه ابتساموو
بعدين يات آلاء من امتحان القدرات مال الجامعه و تبدي القصص معاها
عاد آلاء و ما أدراك ما آلاء وناسه عن عشر بنات لووول من أول ما يات سألت ياو البنات قلت لها لا تقول: @@ طحححححححححححححت ، باريسو و الله فشلتينا ماتعرفين تعزمين جان اتصلتي لهم و أكدتين عليهم، أنا: والله مو انا الي مخططة الى هالعزيمة ، وكل مرة أعزم اييون.. و بعدين أنا ماحب ادق عـ احد زين اكلمهم ع المسنجر .
بعدين اتصلت بنت من الي عازمتنهم ( زين تعنت بعد اتصلت ) و قالت ما تقدر تيي قلت لها لا عادي ( كان في خاطري أقول لها انه ولا وحدة من البنات بتيي ) و القهر بعد يقولون سلمي ع البنات الي يااو < كاااك

و تبدي القصص مع آلاء: شخبار الامتحان معااج؟
آلاء: اووه سكتي صععععععععععععب اكيد برسب فيه بس الرياضيات سويت فيه اوكي تخيلي كلمات يايبين لنا ما اعرفهم من وين تقولين حتى قمت اخلي دوائر عل و عسى ابي اشووف اي كلمه اعرفها و العربي بعد حليته في نص ساعه و خليتها ع الله حتى نسيت شنو اسم فاعل و اسم مفعوول .
اختي: يالذكيه اسم فاعل ع وزن فاعل مثل طالب، و اسم مفعول ع وزن مفعول مثل مكتوب.
آلاء: ادري قلت جذي بس لاحظت الكلمات ما تركب ع بعض حاولت اركب بس ماعرفت لووووووووول
آلاء: الا ما قلتوا لي البنات ستايلنا و له شنوو؟؟!
أنا: لا هذووله بس يعني زميلاتي بالصف مب ربعي.
آلاء: اي زين عيل.
أنا: الحين عاد يبيلنا ناكل قصب لووول.
آلاء: اي بناكل انا اوردي مو متغديه بعد.

بعدين قضينااها .. وناسه بصراحه مع آلاء و سووالفها و بعد يات عمتي الي اهي امها و مع سويتي
آلاء سوالفها ما تنمل و تضحك حتى لمن بتمشي قلنالها لا تروحين قعدوا شوي قالت باجر وراي معهد ماقدر و آخرتها علينا بالعافيه و حقكم العافيه لوول :)

الثلاثاء، 9 يونيو 2009

النتايج

طلعت نتايجنا اليوم احنا و المدارس الابتدائية و ع طلب الغالية تروث و بحرينية قدساوية اني اخبركم بنتيجتي ، طبعاً .. الحمدلله هالكورس كان وايد أسهل من الكورس الي فات و الامتحانات أسهل بعد و الشكر كله للجهود المبذولة من قبل وزارة التربية و التعليم و الشكر مرة ثانيه لمعلماتي العزيزات الي ساهموا في تعليمنا و تخريجنا من هالمرحلة و ما ننسى فضلهم في تربيتنا و توجيهنا و الحمدلله اني ارتفعت هالكورس عن الكورس الي فات 4 درجات بس ما بقوول لكم الدرجة بالضبط لاني قايله اذا اقل من 95 ما بقوولها لوول ( يعني واضحة جم الدرجة ) و ما عطونا بعد شهادة تفوق بس عطونا للرياضيات شهادة تفوق مادري ليش و يوم الاحد بيسوون حفلة للمتفوقات و حطوا النتايج في الجريدة و الي يبي يصور راح يصور احنا طبعاً ما نصور .. اقل من 95 ما نصور بعد اللعام بنت خالتي 98 و ما صورت عجزوا معاها الجرايد يتصلون لها ما تبي تصور لا اهي و لا اختي بعد يعني ما بتشوفون حتى صورة لي بالجريدة لوول و ما بقوول بعد رقمي الشخصي لان سهل و اذا قلت لكم عنه بس بتحطون سنه الميلاد بالبدايه و الشهر و بعدين كل الارقام نفس الشي ..
مكتوب بالجريدة : %64 نسبة النجاح في الإعدادية والفتيات يكتسحن مقاعد التفوق ،وقد بلغت نسبة النجاح للبنين حوالي 55.50%، أما بالنسبة للبنات فقد بلغت نسبة نجاحهن 72.86% .. يعني احنا اشطر من الصبيان :)
و اهني الخبر من جريدة الايام و جريد الوسط

أنا استغرب من الصبيان اليوم و احنا ناخذ الشهايد ولد عمي راحت امه تاخذ شهادته مشالله عليه وايد شاطر كل المواد 99 و 98 و المواد السهلين الي ما يبيلهم شي 100 و الشي الي فاجأني في العربي حاطين له 100 شلوون؟!!< عطني شوي ع الاقل .. العربي عمري ما يبت فيه درجات عدله يمكن اعلى درجة يبتها فيه 93 حدي و اهو الي دايماً يخرب المجموع يعني اذا يبت فيه بالتسعين استانس .


بس يلااا مبروك للكل و انشالله دووم التوفيق و النجااح :)

و بالاخير حبيت اقوول مبروك لبنت خالتي و بنات خالي ثنتينهم التخرج من التوجيهي انشالله بشتري الجريده و نشووف صوركم فيها و نشوفكم بالتلفزيوون بعدين P:

الأربعاء، 3 يونيو 2009

bye bye school, welcome to holiday

اليوم خلصنا امتحانات الفاينال و آخر امتحان اليوم الي اهو " تربية أسرية " و كان حده سهل و سخيف ،وولكم للاجازة .. اخيراً كملنا

لكن فيه خبر فاجأني اليوم ، و هذا اهوو ..

إعلان نتائج الثانوية العامة غداً كتب - محرر الشؤون المحلية: توقعت مصادر مطلعة أن يتم إعلان نتائج الشهادة الثانوية العامة غداً الخميس، خصوصاً وأن آخر امتحانات الثانوية العامة تنتهي اليوم الأربعاء ويخوضها أكثر من 27300 طالب وطالبة. ومن المتوقع أن تعلن نتائج شهادة المرحلة الإعدادية العامة التي تنهي آخر امتحاناتها بعد غد الخميس خلال مطلع الأسبوع المقبل ويخوضها 32327 طالبا وطالبة. وأشارت إلى أن مراكز التصحيح تعمل على قدم وساق لتصحيح الامتحانات ورصد الدرجات النهائية، وتوقعت أن تنتهي العملية يوم الخميس.
هذا الخبر اهني من جريدة الايام The Link

تفاجأت شنو توهم أمس مخلصين الامتحانات مشالله عليهم وايد سريعين بهالسرعه صححوا الاوراق مال الامتحانات و نزلوا الدرجات الله يستر بس اذا الثانويه باجر احنا يعني السبوع الياي ع هالحسبه ..

من جم يوم شفت هالطير ع البحر و صورته بس ماعرفت شنو اسمه و له نوعه بس حلوو .. اهو مب فلامينغو يبين لي الفلامينغو أكثر شي ورديين و ريولهم طويله هذا صغيرة و غير بعد.. بس هالريشه الي ع راسه حلوة :)


هذا اهو الطير
و اهني يطير

الاثنين، 18 مايو 2009

وداعاً يا مدرستي الاعدادية

انتهى العام الدراسي و الوداع يا مدرستي الاعدادية و كل بنات الي معاي بالصف " ثالث اعدادي فرقة 2 " و انشالله نشوفكم السنه اليايه بخير في المدرسة الثانوية .. بشتاق لكم كلكم كانت ذكريات حلوة لا يمكن ان يخطها قلم لكنها ستظل محفورة في الاعماق و الوجدان .. السنون تمضي و تمر الايام و لكن الذكريات و الاثار تبقى محفورة و لا يمكن ان ننساها مهما طال الزمن .. و ياليتها تعود من ايام .. بتظلون في القلب و ما بنساكم أبد..

لوحة الاعلانات في الصف

السبورة و لو تلاحظون القماش مال التربية الاسرية مقطوط ع الارض لوول

الباب حالته حاله D:
طاولتي و مسكين علم بلادي يعور القلب مقطوط ع الارض و فوقه الطاولة : (

كتبي و العفسة
جدول الامتحانات .. دعواتكم لنا
اول يوم علي 3 امتحانات :(
بمناسبة الانتخابات لقيت هالصورة في كتابي المواطنه عن الانتخابات
CLICK ON THE PICTURE TO SEE IT LARGER

مبروك اللي فازوا من المرشحين
و مبروك لكل اهالي الكويت الطيبين .. و انشالله تكون سنوات خير عليكم :)

الأربعاء، 13 مايو 2009

شسالفه؟؟!

بالبداية اقولكم اول شي الحمدلله صارت حالتي زينة اشوة من قبل يعني وايد تحسنت


من تقريباً اسبوع و انا اشوف عـ اختي الصغيرة هالبروش مثل الي بالصورة و لو تلاحظون مكتوب عليها هيئة ضمان جودة التعليم و التدريب مكتوب عليها بعد "فخور لكوني الاول " هذي اهني ابي اعرف شنو سالفتها ..الاول ع منو؟ و شسالفة الاول؟
اليوم رحت قوقل ابي ابحث عنها هالهيئة طلع لي جذي .. و الخبر مال اليوم بعد يعني من حظي .


هالخبر هاي من جريدة الوسط
مكتوب فيها جامعة كامبردج و مادري شنو.. يعني الحين مسوين هالمناهج كلها اجنبية و برامج و مادري شنو و احنا معطينا بعد " امتحان الوحدة الوطنية " لمادة العلوم و مدرسين أجانب بعد يعني مو الي يعلمونا و اللعام بعد امتحان التيمز عـ مستوى الدول المشاركة ع قولتهم دول اجنبية و دول عربية يعلمون فيه اشياء ما كانوا يعرفوها من قبل مال ثنوي و جامعات و خرابيط
الحين حتى المناهج مغيرينهم مال ابتدائي اتذكر احنا ما كان اكتابنا الرياضيات جذي .


العلوم و الرياضيات مغيرنه لهم .. انا كتابنا ليلحين ما تغير مثل قبل و بعد مشترك لدول الخليج كلها
أنا هذا كتابي الرياضيات ادري كريه بس ما اتوقع احد ما درسه من صف اول ابتدائي للاعدادي كله جذي كتبنا ><
هذوله كتابهم معرب .. مكتوب فيه من داخل أعدت النسخة العربية شركة العبيكان للابحاث و التطوير و التعريب نسخة من المتخصصين و مخلين اسم مؤلفين الكتاب بالنسخة الاجليزية ميري و دون و كريستينا و جاك و غيرهم ....و اهني للي يبي يشوف سايتهم مال شركة McGraw hill مؤلفين الكتاب اعني ..

يعني هذا للي يبون يتطورون يبون تعليم عالي .. يبون مثل الدول المتقدمة احنا جذي مناهجنا و محد يبي يدرسها بعد مو اذا غيروا فيهم .. خل يدرسون هالكتب الصعبة هاي بعد ما شفتون كتابها العلووم اخس من هذا فيه عن الخلايا و غيره و فيزيا و كيميا يعلومنهم مساكين معنهم توهم اصغار.

الاثنين، 11 مايو 2009

I'm sick =(

تعبانة حيل ومريضة فيني انفلونزا و بلاعيمي تعورني :(

يعني دايخة حدي
------------------------------------------

بس خل افرفش شوي ..

تتوقعون شنو هذا ؟

طبعا فاكهة..بس انتي قولوا هاي شنوو؟ ما فيه جائزة عاد للي بيقولها صح
يعني تووها نابته بالشيرة شكلها حدها عجيب
so tiny
حجم الفاكهة العودة مو جذي .. لأ .. اكبر بوايد منها تقريباً هاي طولها سنتيمتر و نص


السبت، 2 مايو 2009

ذكريات + اعتذار لـ " للكلمات بقيه .. "

البارحه امي و خالاتي راحوا السعوديه و بقت بس وحده خالتي معانا و بالليل قبل لا ايون قالت لنا خلكم من النت و تعالوا نسولف مع بعض ، و قعدنا انا و بنات خالتي نتكلم معاها ، قمنا نتكلم عن اشياء قبل كنا نخاف منها .. قالت لنا خالتي قبل كانوا يخوفونهم بأم الخضر و الليف لوول قالت لنا موقف صادهم لمن كانت اصغيره تقول كل مره ما تنام بالليل و تقعد تصيح و امي العوده تقولها الحين بتيي لج ام الخضر و الليف اذا ما نمتي و مره كانت قاعده مع اليهال قاعدين يتكلمون يم النخل و عرفوا انهم يقصدون بأم الخضر و الليف اهيا النخله .. هالمره خالتي قالت لامي العوده فهمت انتي شنو تقصدين بأم الخضر و الليف ( النخلة) قامت امي العوده تضحك عليها .. بعدين تقول خالتي طلعوا بدعه يديده ( ابو السجاجين) و كان في هالفتره يبوقون اليهال < صج يعني مو غشمره > و تقول من يدشون الحمام كانوا يخافون يطلون من الدريشه اكو احد و له لأ و كل واحد يتصور ابو السجاجين هذا شلون .. تقول اهيا كانت تصوره انه عينه واسعه و في جسمه كله سجاجين لووول .. في هالفتره بالذات في ياهله بالفريج باقوها كان عمرها سنتين ، كانت واقفه يم الباب و امها بالمطبخ ما مهلت خمس دقايق و طلعت الا ماكو احد الياهله اختفت و لليوم و لباجر ما يدرون وينها ..
خالاتي و امي كله يقولون سوالفهم و مغامراتهم لنا خصوصا بالعين ( عذاري ) بس سوالفهم تشوق ..
تذكرت انه حتى احنا لمن كنا صغار كانوا يخوفونا بأم الخضر و الليف و حتى اذا سمعنا صوت جلب بالليل كنا نخاف منه
________________

يبت لكم جم صوره لمن كنت اصغيره بس لحد يتطنز علي لوول

هاي انا لوول

انا و اختي

اختي

فيه شبه بينا يعني؟
مادري ليش حسبالهم توين معنه ما نتشابه :\
( المباركيه صدقت انه احنا ثنتين؟)

زعلانين

انا .. جني صبي


اختي توو
صباح الخير.. صباح بسكوت بالككاو
تونا صاحيين من النوم اهني
لوول


اضحك اهني بدون طناز بليز

كله زعلانه : (

___________________


للكلمات بقيه:
اعتذر لك نيابه عن اختي تراها مو قصدها بالعكس اهيا طيبه و حبوبه و الي عايش معاها و عارفها يفهمها زين و كل السالفه اهيا اختلاف بالراي .. كل واحد عنده وجهة نظر مختلفه و ميول و هوايات و محد يجبر غيره انه يحب الي يحبه يعني مثلا اهيا تحب الكيم مو شرط الكل يحب الكيميا.. انا وحده ما احب الكيم بعد ;P

يعني مو تحط في خاطرك عليها .. ما عليك منها لوول
السالفه ما تسوى و انا اختك و اتمنى انه ما يتكرر هالشي

الخميس، 23 أبريل 2009

Adhari Park


اليوم ودونا المدرسة رحلة الى عذاري ، أول ما رحنا قعدنا ع الطاولات بعدين كلهم راحوا الحمامات الي تبي تعدل شيلتها والي ما ادري شنو تبي تسوي المهم ، يات لنا بنت تقول: بناااااااات الي مو لابسة مريلة مابيعطونها سويرة < مثل الي بالصورة تحت >، و أنا من غبائي حطيت المريلة بالباص والي معاي بعد، احين شنو نسوي اذا نروح لهم يقولون لنا رفعي العباية، بعدين وحدة من البنات فاصخة مريلتها اشوه انها حاملة جنطتها وحاطة بيها المريلة اخذناها و كل مرة دور وحدة تروح ابها حطيناها بس جذي تحت العباية وعطونا ، دخلنا داخل و أول لعبة لعبناها spinning madness بعدين ركبنا Disk'o' ( لعبتها مرتين ) و لعبنا العاب غير، و بالاخيركنت بروح اشتري لي باستا من يم يم تري و كان عند ارفيجتي بوكي و بالاخير لقيتها عند المدخل واقفه عشان ندش الباص فخلاص ما رحت شريتها لان المشرفه ما خلتنا نروح معني كنت خاطري في دونت من كريسبي كريم و بعد ما كفى الوقت بس بالاخير قضينا وقت حلو و وناسه .. يعني تغيير جو عن الدراسه شوي ^^

و هني الي يبي يشوف شوي عن عذاري ..
the link




الأربعاء، 15 أبريل 2009

Back

الحمدلله فترة الامتحانات عدت و خلصنا اول امس ، اشكركم كلكم عـ كل شي و سوري عـ ردي المتأخر على كومنتاتكم : )
و ابشركم النتايج كانت زينه بعدد لكم المواد الي عطونا نتايجهم لحد الحين :

رياضيات : 20
English:20
التربية الاسلامية : 18.5 : (
<< الدرجه من 20
________________________________

يوم الخميس السبوع الي طاف رديت البيت، و كان الوضع عادي لاني ارد قبل اختي الصغيرة ، بعدين يا السايق مالها و سئلته امي وين ( إيمان ) قالها مادري سألت البنات قالوا ما يدرون وينها قلت يمكن أخذتيها، ويت الساعة ثنتين و شي و للحين ما ردت و السايق يدور عليها ما لقاها و أمي راحت اهيا بعد تدورها بالمدرسه سألت العاملات وينها ما لقوها و سألت ارفيجتها يم بيتنا تقول ما تدري و بعدين امها قامت تدور وين اختي بعد و كل حين ما تيي البيت تسال : ها ردت الماما؟ حصلتوها؟ اقولها لا و اهيا مسكينه بعد قامت تحاتيها تقول ياهله و ما ندري وين، و امي من الزهقه بعد نست تلفونها و راحت تدور وينها و كل شوي يدقون عليها و انا اشيله و لا عشره اتصالات في الدقيقة الوحده لووول حتى قمت ارد ع تلفون البيت و موبايل امي بعدين امي راحت لرفيجاتها الي معاها بالصف و سالتهم و ما يدرون وين بعدين ابو ارفيجتها قام يدور مع امي عليها الله يعطيه العافيه و الكل قام يسال عنها فتحت المسنجر و الا الكل يسال عنها اهني امي عاد لمن سمعت الكل يقول ما يدري وينها غاب نسمها قامت تبجي وينها بالاخير ردت المدرسه و محد كان فيها و قاموا العاملات يدورون مره ثانية و لقوها بغرفه الاشراف نايمه لانها كانت مريضه و محد يدري عنها و لو الباب مقفول جان الحين في عداد الموتى اهيا و محد معاها ، بعدين دق السايق مره ثانيه رديت عليه < هني انا غشيت ضحك > ها لقيتوها قلت ايه في وين؟ اقوله بالمدرسه غرفه الاشراف ، قام يقول هاي وين هبله ما تشوف الياهله نايمة نشفت ريجنا ماقدرت اشرب ماي اقول لازم الاقيها امانه بيدي و أخذ مني رقم امي عشان يدق عليها يقول لازم اشتكي عليها يقول لازم امج يوم الاحد تيي معاي عشان نشتكي عليها بس امي قالت ما تبي تقطع رزق احد و ما صار الا الخير و ردت سالمه..


الثلاثاء، 31 مارس 2009

be right back (B.R.B)


هااي بلوقرز
شلوونكم ؟
شخباركم ؟
من زمان ما حطيت بوست يديد
كنت بكتب عن المطر الي عندنا كل اليوم الحين انقلب غبار اليوم حسافه :(
اول امس الرعد عجيب ادري يزهق و الناس يخافون بس كان عجيب حده
ما خفت يعني لووول و السما كان لونها احمر ع بنفسجي الوان..
جذي بالضبط مثل الي في الصورة بس ع حمره
طول هالسبوع كان عندنا مطر و الاسبوع الي قبله كان فيه شوية مطر

بس الحين يعني نستأذن منكم لان بنبدي الامتحانات ورا باجر
ادعولنا بالتوفيق ^_^


الأربعاء، 18 مارس 2009

school news

اليوم في المدرسة صارت لنا سالفة، في الطابور صفنا خايب مايحبون يسون شي بس الي جدام واقفين يسون الي تقوله المعلمة الي هو التمارين الصباحية، المهم الصف الي يمنا مربية صفهم تأخرت فصفهم صار كلا ازعاج ويسولفون ويضحكون، جان معلمة تعصب وعبالها من صفنا مع انا احنا ماسوينا شي وهادئين، وبعدين يوم بنروح الصف المعلمة قالت ثاث اعدادي بيتعاقبون وبيتمون واقفين والمديرة بعد كانت معصبة علينا تناقشت مع مشرفات القسم وقالت لهم بيتمون واقفين 3 الحصص الاولى و يت يم صفنا وزفت بنت من الي ويانا في الصف قالت لها ان انتي قليلة أدب ومصدر الإزعاج و انتي رئيسة العصابة و و و، ولا بعد ماكتفت وقالت لها انا اجوفج ع طول تتحركين و تروحين واتين ع كيفج كأنج قرد يتنقز وانت اللعام راسبة وبعد تبين ترسبين السنة بس البنت صاحت تأثرت ( مسكينة ) ولا بعد ما كتفوا نوقف 3 حصص قالوا لنا ان كل وحدة بنتقص 5 درجات من درجات السلوك في كل مادة يعني 35 درجة ولا ويقولون لنا ان نسبة النجاح في الفصل الأول 58% (طبعاً نسبه نجاح ع مستوى مدارس البحرين الاعدادية مو تفوق بعد نجاح بس)


وقفت المديرة شوي وبعدين راحت مكتبها و قالوا لنا الحصة الاولى بيعتبر الدرس مشروح و ما بينشرح وخلوا كل صف يوقف في جهة، ويات المدريرة المساعدة وقالت كل بنت تطلع من صفها وتروح تعتذر، وراحوا اعتذروا وقالوا لنا نكتب رسالة تعهد و توقع كل بنت و الصفوف راحوا بقينا بس احنا في الساحة حصتين تقريبا وبعدين طلع ان بس احنا الصف الوحيد الي كتب رسالة و وقعوا :(

الثلاثاء، 10 مارس 2009

7amood photos

هاي صور ولد خالتي اليديد مثل ما وعدتكم اني بحطلكم صوره ، صورت له بس جم صورة لانه كان نايم :/



مخنفر شوي يعني مو تقولوا اني اعيب لا ترا حتى خالتي الي اهيا امه تعلق عليه بعد

ككاو (يعني اسمراني)

و سلامتكم :)