السبت، 27 يونيو 2009

العطله معاي : (


السلام عليكم و رحمة الله و بركاته


بدايةً حبيت ارحب بكم بكيكه النجاح هذي ع طلب علي الملا ( ما يصير خاطرك الا طيب يا علي و ادري تأخرت < صح النوم ) طبعاً اهيا من زمان و من متى مخلصين مدرسة جريب بنكمل شهر بس سامحوني اذا قصرت مع احد و لا شي تراني متملله حدي بهالاجازة و مافيه شي اسويه و متخايبه ، ابي اشغل وقتي بشي ابي اسوي شي ماكو شغل الجو حار برع و ما حتى ماتدرين تطلعين طلعت بس شويه بالحوش احس روحي صرت باربكيوو حر حر حر بشكل مو طبيعي اذا حر الدنيا جذي شلون حر الآخره .. اعوذ بالله من عذاب النار و غضب الجبار و الله يجعلنا وياكم من الصالحين المهتدين و الفايزين برضوانه و جناته و يبعد عنا عذاب النيران ، لانه صج صج اذا الواحد يشوف جذي حر الدنيا يفكر بحر الاخره شلون اذا هاي و لا شي من حر الاخره .. ما اقول بس الا الله يعينا بصراحه حر جهنم فطسه ما تطلعين برع دقيقه و تيين الا ويهج احمر و دايخه و حتى البشره قامت تبقع و يطلع حرار مادري شيسمونه من هالحر ، معني ما اطلع بعد لان ما اقدر ع الحرارة . افكر يعني الناس شيسوون بالاجازة غير السفرات مللللللل و لي اليوم و لي باجر لو اقول ملل ما اخلص ، الجو فطسه حر يعني ما ينطلع مكان و اذا بيروح مكان لازم مكان مكيف مولات و غيره مليت من هالاماكن ،ابي مكان اروح له .. الواحد بالصيف حتى شهيته تنقطع و ما يبي ياكل الا اشياء بارده و سوائل حتى الاكل صايره ماحب اكل الفواكه تخترب و اهي بالثلاجه محد يعطيها ويه و انا من اكل شي و طعمه ما يعجبني اطنقر ع الكل و ما اكل شي حدي اذا باكل اكل ككاوات و حتى الحين اشاعات طالعه بعد السنكرس و تويكس وباجي الربع و من ضمنهم كادبوري فيه من مشتقات الخنزير يعني شناكل ما باجي الا يقولون بعد Lindt و Ritter sport و Hershey's و غيره مسممين و فيهم من مشتقات الخنزير .. مادري يوم اليمعه شاللي خلاني اكل برتقال احمر (مادري شيسمونه ) يمكن لان كنت مع عايلتنا و الكل ياكل فشتهيت اني اكل بس عجبني لاهو حلو و لا حامض مادري شلون طعمه و من الملل ذاك اليوم ماكو شي اسويه و لا كتاب عدل اقرا فيه قعدت اقرا كتاب English grammar تعلمت لي جم شي ع الاقل ، و حتى كليلة و دمنه صار لها دهر عندي ما اقرا فيه شي مليت احس روحي حفضت اسلوب ابن المقفع من تشوفون شي بابدايته مكتوب زعموا ان عرفوه انه ابن المقفع صار لي سنوات و انا اقرا فيه بصراحه الكلمات ما ينفهم لهم عدل و الكلمات السهلة مخليين لها هوامش تحت معناها مثل مقايضه هاي عاد كلمه سهله و فيه كلمات حتى ما تنقرا مب مكتوب لها أي معنى فأتملل اقرا فيه و القصه الوحده جم حكمه فيها يعني الواحد يبيله يقراه بتمعن عشان يفهم مضمونه، و مسجله في دورة فوتوشوب و خبر خير ليلحين ما بدت و لا ادري عنها بعد . و من قد ماهو ملل اقعد اقرا بالبلوقات ..النت اهو الونيس الوحيد بعد الفترة الاخيره الكل انشغل بامتحانات و غيره .. واحشتني كويت احد يعرف عنها شي ماشي ليش اختفت مره وحده ؟؟
ابي اقتراحات شي اسويه بهالعطله مليت و يزاكم الله خير ----------------------------------------------------------------------

يوم السبت السبوع الي طاف طلعت مع خالتي انا و اختي و بنت خالتي و خالة افتخار ( وحده من الاهل ) و معانا علوي ولد خالتي الي اهوا اخو حمود انا احبه هالياهل لطيييف بصراحه و ينحب بسرعه و عليه حركات تخلي الواحد يضحك و ما يمل منه.. المهم احنا رايحين نشتري لعمته هديه أول ما ركبنا السياره كان اهوا داخل من تدش وحده قال سكي باب قلنا اكيد صاير شي معقوله يعني بيقول هالحجي مني و الطريج قالت لنا خالتي لاني معلمته من يدش يصك الباب و بعد يتأكد كلنا ركبنا و له لا.. ينادي بالاسامي وين ستومه قلنا له كاهيا قال قعدي ستومه بعدين و احنا رايحين و له بنت خالتي تزعله و يسوي روحه يبجي و زعلان الا يقول ييبي كلينكس قلناله ما عندنا و الا خاله افتخار تقول طلعت منت هين يالسعودي خايب النُوا ما تعطي ويه و لحاجتك تبي ضروري و فاضحنا فضاح ما ظل احد ما يعرف اسمنا بسبتك مو مسوي سوايا، قالت لنا ها عطوه و يسوي روحه يمسح دموعه و لو تشوفون ويهه و لا دمعه نازله بس يسوي روحه رجيج ( رقيق ) فوق اللازم عاد اهوا زعل اهني و من تحط شي بالسله قال بقتّه زباله و ظل زعلان منها و يقولها السعاده السعاده ( يعني عساج السعاده ) و بعدين عطته عصير قالت له ها اخذ اشرب قال لها ييبي قطا قالت له وليه ما تخلص شروطك <عشان اذا شرب يصك الغرشه بروحه محد يصكه له .. و بالاخير ردتنا البيت لازم يتأكد ماما سكيتي باب قالت له اي قفليه قفليه ماما قفليه و يتأكد كلنا يينا ، مسكين عاد خاله افتخار مسويه له فلم رعب و ما تناديه الا علوو والسعودي .

سكي = صكيه ، قطا = غطا ، بقته = بقطه ، ستومه= فطومه


هالصور لمن نايم معاي ذيك المره ابي اصوره ما يووقف عدل بس يستانس ع التصوير من يشوف الكاميرا عندي قال السورة بالتلفون ( يسميها تلفون ) فرق بينه و بين اخوه ما يتشابهون

ما يعطي ويه اهني


22 التعليقات:

Manal يقول...

بداية
كانت خوش بداية شهيتيني الله يهداج عندنا الناس ليل مو وقت اكل

:)
مبروك التخرج

تستاهلين كل خير

منها لاعلى
:)

ويا حلو اليهال
الله يخليهم

yoyo يقول...

صباحك سكر

فى الاول انا سعيدة بزيارتك لمدونتى اللى من خلالها عرفت مدونتك
وان شاء الله يكون فى بينا تواصل

الف مبروك لتخرجك
وان شاء الله تستمتعى بالاجازة
حاولى تعملى حاجة انت بتحبيها وتشغلى وقتها بيها اكتر

دمتى اختى بكل خير وسعادة
تحياتى
يويو

TruTh يقول...

اتوقع لو تاخذين دورات راح تستانسين شوي و هم تستفيدين بنفس الوقت

جربي دورة انقليزي و جذي

و عسى الله يحفظه و يخليه لكم ولد خالتج العنونو :)

Nikon 8 يقول...

مبروك النجاح
ما شاء الله عليك إسلوبج حلو وعندك قابلية للتعلم وشغل أوقات فراغك
بارك الله فيك :)

Paris يقول...

Manal :

لووول عليكم بالعافيه

الله يبارك فيج

حلت دنياج، الله يخليج :)

Paris يقول...

yoyo :

ياهلا و الله

و انا سعيده بمرورج اهني

الله يبارك فيج

بحاول اني قد ما اقدر اسلي روحي بهالاجازة عن الملل و اسوي شي

و حياج الله :)

Paris يقول...

TruTh :

اي عارفه و زين بعد من هالدورات تشغلين وقتج و تستثمرين هواياتج و جي و تتعرفين ع ناس بس بعد الدورات يبيلهم منو الي يلتزم و جذي و ماتوقع هالشي اقدر اسويه

و يحفظج و يخليج :)

Paris يقول...

Nikon 8 :

يا هلا فيج

الله يبارك فيج و مشكورة ع كلامج الحلوو

حياج الله :)

فاطمة الزياني يقول...

الواحد يجرب ليش لا الحياة تجارب..

وانا اكثر انسانة اجرب في روحي هههههه


الله يخليه لكم ان شاء الله

وردة فرح يقول...

ما شاء الله عليه ،،
الله يخليه لأهله ،، :)

و الله يجيرنا من حر الآخرة ،،
دمتي بود حبوبة ،،

علي يقول...

باريسوووو الكيكة يبست من الهوا غلفيها بنايلووووووووون عاد :(


تسلفين الكتكوت في الويك اند نوديه عذاري مع اليهااااااااال كلهم ؟

Unknown يقول...

مبروك النجاح والتَخرج ..

والله يكون في العون ع الاجازة ..


احنا اجازتنا اسبوعين .. كلها كم يوم ونبتدي صيفي ..


الكتكوت الجميل .. الله يخليه ليكم .. وان شاء الله تشوفون كتاكيته :p



موفقة

lOsT يقول...

يحليله الله يحفظه ويخلي لكم الأشقراني :*
ماشاء الله تبارك الرحمن

باريس تقدرين تستغلين الإجازه بوايد اشيه .. انا عرفت انج تحبين الرسم .. ليش ما ادورين على دورات تخص الرسم وتردين ترسمين =)

واذا عندكم أنشطه صيفيه حاولي ادشينها منها تستغلين وقتج وتتعلمين شي مفيد

بالتوفيق ^_||

زهرة الياسمين يقول...

هالحمود حركات بعد
مستوي محرمكم و يخاف عليكم خخخخ

يسلمو ع الكيكه لذيييذه
شهيتيني و أنا مسويه ريجيم ><

الغدوف يقول...

الله يعينكم على الجو ,من جد خليتيني بهالوصف احس بالمعاناه, ما أتحمل الحر ولا أعيش فيه أبدا متعوده على أبها ( فديتها )


ومبروك النجاح والتخرج ,الله يوفقك دوم

وبإذن الله تلاقين الشيء المفيد إللي تستغلين فيه الإجازة ( الدورات الصيفيه .. المراكز الصيفيه ..

تحياتي

Paris يقول...

فاطمة الزياني:

صح كلامج ، و أنا بعد نفسج ما أجرب الا عـ روحي

ويخليج :)

Paris يقول...

إنسانة :

ويخليج ويحفظج

آميــن

Paris يقول...

علي الملا:

جان لحقت عليها من البدايه و اهيا فريش :P

عادي اسلفك و لوو ليش لا بس ها ما اوصيك انتبه له زين

Paris يقول...

زَهـرَاءْ :

الله يبارك فيج

صج الله يعينكم عيل

و يخليج و يسمع منج

حياج الله :)

Paris يقول...

lOsT :

عيونج الحلوةو الله يخليج

بحاول قد ماقدر اني اشوف لي دورات مناسبه

مشكوورة ^_^

Paris يقول...

مجرد نقطة :

هلا و الله

لوول حمود اخوه مب اهوا

و الله صج عليه حركات مثل ماقلتي هذا بعد و لا شي من الي يسويه

تفضلي حياج الله و خلي عنج الريجيم :)

Paris يقول...

الغــدوف :

ايي سمعت يقولون ابها جوها حلوو بس بعد البحرين حلوة حتى لو جوها حار :)

الله يبارك فيج ، و مثل ماقلت بحاول اني اروح مراكز و دورات صيفيه

مشكورة و حياج الله =)